Het twijde perron

t Is zoaterdagoavend, t twijde perron,
Zien wichtje dij staait al te wachten,
t Is boeten routkold mor van binnen is ze waarm,
Ze ston der al even over achten.

Tussen Hoaren en Helpman zigt e zukzulf,
In t roam van dij ol Intercity,
Wat spij op zien lok en hai denkt aan heur woorden:
Ik raais in gedachten voak met die.

Om twinteg veur negen, ja din komt ter n train,
n Luudspreker belkt wat berichten,
Ze lopen t perron of, de nacht is nog jong,
En overal bliede gezichten.

De zundag vlugt om en t is zo weer oavend,
Ze stoan op t perron met zien baaiden,
Ze kropt tegen hom aan en hai holdt zuk zo stoer,
En ze schraait deur t idee van de schaaiden.

Tussen Hoaren en Helpman zigt e zukzulf,
In t roam van dij ol Intercity,
Wat spij op zien lok en hai denkt aan heur woorden:
Ik raais in gedachten voak met die.

Om tien over negen, ja din gaait ter n train,
n Luudspreker belkt wat berichten,
Ze lopt t perron of en rilt van de kol',
En overal zwaarde gezichten.

Ze binnen al laank traauwd en ze binnen al weer schaiden,
En baaiden hebben heur aigen gedachten,
En zoaterdagsoavends op het twijde perron,
Doar stoanen al weer aandern te wachten.

Ik bin op miezulf en ik mout mie mor redden,
Mor k kin der nog nait zo best tegen,
t Is zoaterdagoavend en k loop noar t station,
En de klok het het twinteg veur negen.

Om twinteg veur negen, ja din komt ter n train,
n Luudspreker belkt wat berichten,
Ik loop t perron of en ril van de kol',
En overal zwaarde gezichten...