Vata, mutta, kind

Im Ö oda in da Fettn
Auf jedn Foi im Zuan
Do is a rabiat wuan
A manxmoi gengan Buam
Wanna eam z´vü platzt hod
Wia hoid Gschroppn rean
Wanns grod de erschtn Zähnt kriagn
Und oft a Nocht lang plärrn

Kinda san oft Gfrasta, hod a gsogt
Quöln de bis aufs Bluat
Und wann da de Hand gach auskummt
Hüft des mehr ois wia jeds Wuat
Oba a freundliche Famülie
Nau, wia haaßens gschwind
Ganz normale Leit hoid
VATA, MUTTA, KIND

Vielleicht a bißl laut hoid
Oba wer hätt se sowas denkt
Daß dea sein eignan Buam daschlogt
Und se drauf am Fenstakreuz dahängt...

Gspitzt woas scho, de Klane
Wos waaß ma, vielleicht woas krank
Ma hods ned vü zum Gsicht kriagt
Manxmoi im Hof unt auf da Bank
Do is dann gsessn mit ihre Pupperln
Und hod se brav allanich gspült
Weu mit d´andern Kinda hods ned dürfn
De woan en Papa oiweu z´wüd

Jetzt spüd de Klane nimma
Jetzt is daham vabliat
Da Vata hods amoi zu oft gnumma
Und de Mutta hod se z´lang dafia geniert
Oba a freundliche Famülie
Nau, wia haaßens gschwind
Ganz normale Leit hoid
VATA, MUTTA, KIND

Vielleicht a bißl eign hoid
Oba wer hätt se sowas denkt
Daß des bei dia im Stock passiert
Und ma nix merkt davo wos rennt
Und ma nix merkt davo wos rennt
Und ma nix merkt davo...