De di hamein aazaadi

de di hamein aazaadi bina khadhg bina dhaal
saabaramati ke sant tuune kar diya kamaal
aandhi mein bhi jalati rahi gaandhi teri mashaal
saabaramati ke sant tuune kar diya kamaal
de di ...

dharati pe ladi tuune ajab dhang ki ladaai
daagi na kaheen top na bandook chalaai
dushman ke kile par bhi na ki tuune chadhaai
vaah re fakeer khoob karaamaat dikhaai
chutaki mein dushmanon ko diya desh se nikaal
saabaramati ke sant tuune kar diya kamaal
de di ...
raghupati raaghav raaja raam

shataranj bichha kar yahaan baitha tha zamaana
lagata tha mushkil hai firangi ko haraana
takkar thi bade zor ki dushman bhi tha taana
par tu bhi tha baapu bada ustaad puraana
maara vo kas ke daanv ke ulati sabhi ki chaal
saabaramati ke sant tuune kar diya kamaal
de di ...
raghupati raaghav raaja raam

jab jab tera bigul baja javaan chal pade
mazadoor chal pade the aur kisaan chal pade
hindu aur musalamaan, sikh pathaan chal pade
kadamon mein teri koti koti praan chal pade
phoolon ki sej chhod ke daude jawaharlaal
saabaramati ke sant tuune kar diya kamaal
de di ...
raghupati raaghav raaja raam

mann mein thi ahinsa ki lagan tan pe langoti
laakhon mein ghoomata tha liye satya ki sonti
waise to dekhane mein thi hasti teri chhoti
lekin tujhe zhukaati thi himaalay ki bhi choti
duniya mein bhi baapu tu tha insaan bemisaal
saabaramati ke sant tuune kar diya kamaal
de di ...
raghupati raaghav raaja raam

jag mein jiya hai koi to baapu tu hi jiya
tuune vatan ki raah mein sab kuch luta diya
maanga na koi takht na koi taaj bhi liya
amrit diya to theek magar khud zahar piya
jis din teri chita jali, roya tha mahaakaal
saabaramati ke sant tuune kar diya kamaal
de di hamein aazaadi bina khadg bina dhaal
saabaramati ke sant tuune kar diya kamaal
raghupati raaghav raaja raam