't is 'n veurrecht hier te leven

Je hebben sums 'n moment, wel kin dat nait
Dat je allinneg weden wil
't Hoge Laand geft mie die rust
In allervrougte, 't is doodstil
't Is fluusterg en takken van bomen
Goan zachies hinneweer
Om dizze stilte zo te hollen
Fluuster je zulfs nait meer

refr.:
't Is 'n veurrecht hier te leven
Je staait ter nait aaltied bie stil
Goa je 't mit wat ook vergelieken
Din maark je het verschil
Ik huif echt nait zo neudeg vot
Ik mis de roek en kleur
As 't koolzoad staait in volle blui
Blief ik laiver dicht bie deur

Daauw verdwient, zun komt op
'k Vuil de eerste zunnestroal
Laankoet in 't gras, haanden onder kop
Lig 'k te dreumen in onderwaal
Daauweln op noodweg, richten hoes
Onderwegens blief k evenpies stoan
'k Tuur over baauwte tegen zunne in
En loat mien gedachten goan

refr.

'k Bin allinneg, mor 'k vuil mie best
Aineghaid kin ik nait
't Leven is hier mie ales weerd
Ik heb hier gain verdrait
Zun gaait onder, 'k goa aan zied
't Was 'n laange dag
'k Val in sloap en 'k dreum dij naacht
Van 't laand dak zo geern mis

refr.