Doe laiver as ik

Hai struunt laangs stroat, schounen kepot
't Hoar haangt hom op kroag
Prat in zokzulf, ogen blier in kop
Zien bainen goan troag
Minsen lopen mit 'n boog om hom tou
Kieken mit 'n schaive blik
Zugst heur denken: "'t is dien aigen schuld
Doe laiver as ik, joa, doe laiver as ik"

Aal zien bullen in 'n taze op rug
Nusterg lopde deur Stad
Slept in 't paark of op 't stoatsion
Breekboar en moager as 'n lat
Zint van 't leven gaait hom veurbie
Gain mins dij doar mit zit
Zugst heur denken: "'t is dien aigen schuld
Doe laiver as ik, joa, doe laiver as ik"

Ais was hai 'n beudel van 'n jong
Mit dreumen, beste van klaas
Haar 'n goie boan, 'n vraauw, 'n schier hoes
n Leven dat zorgloos was
Vanmorgen is e vonnen op 'n baank in 't plantsoen
Sturven in ainzoamhaid
Minsen denk noeit: "'t is dien aigen schuld"
Want in toukomst kieken kinnen wie nait
Nee, in toukomst kieken kinnen wie nait