Mien oosterpoort

Geboren en opgruid in t Groot Loug
In wiek "De Oosterpoort"
t Was een noflek noaberschop
Plezaaier was t sleutelwoord
Een wereld kiender doudestieds
t Was aaltied drok op stroat
Noa schoultied wer der boeten speuld
As blikspuut, landverroad
Verlosken, koeltjen, bakjegooien
Ook tiepeln was te gek
Hoelahoep en tollen op stroat
Aan spelletjes gain gebrek

refr.:
Dat dail van Stad, dat bie mie t hoogste scoort
Blift ongetwiefeld wiek "De Oosterpoort"
t Zuderpaark en Oosterweg
As ook de Meeuwerderboan
Veemaartstroat, Winschoterdaip
t Blift aaltied bestoan

Aan overkaant van mien hoes
Was t plietsieconsuloat
Binnenkaant heb ik n poar moal zain
Wegens t kattekwoad
Op "Riekensschoul" heb ik lezen leerd
Sommen moaken, je zong n laid
Van schoul verplicht noar t badhoes tou
Want n does thoes haarve nait
Ainmoal in week was t baistemaart
Wat haarve doar plezaaier
Deensdoags extroa drok in wiek
Veul boeren en kooplu mit heur daaier

refr.

Schoul en badhoes bestoan nait meer
Ook nait ol baistemaart
En as je nou plietsie neudeg hebben
Mou je noar Roadermaart
Op plek van kerk in Paarkloan
Stoat nou n bejoardentehoes
Mor kom k bie tieden op fietse laangs
Vuil ik mie even weer thoes
Mien kindertied beleef ik weer
k Zai mie weer speulen op stroat
Mien jonkhaid goat in n flits veurbie
Ik wait dat dit noeit over goat

refr.