Ik wil noar boeten

Mien digitoale snelweg is het maaipad langs de sloot
Mien beeldschaarm is t landschop sums klaain mor maistieds groot
Boetendeure is mien Internet de zin van mien bestoan
Doar vuilst de stroom van de bliksem, van de zunne en de moan

De wolken in de locht binnen mien floppys, mien bestand
Nee, nait uut n plestiek deuze mor hangen boven t wiede laand
Mien Windows lopen van Westerwolle deur t Stad noar t Hogelaand
n Kloede klaai is tastboar net as iezer en as zaand

Refr.:
Ik wil noar boeten tou, ik wil noar boeten tou

Wel klikt dr op de moeze, wel drukt dr op n knop
De robotten van de nije tied en kinder lopen veurop
Mien harsens binnen de printer en mien ogen binnen t pepier
Ik bin mien aigen virus in t computerverkeer

Dus luuster noar joen virus deur de koabel of n droad
En druk mor op "escape" want ik heb t leste woord
Mien digitoale snelweg is t maaipad langs de sloot
Mien beeldschaarm is mien fantasie en dij gait langzoam dood